ഇന്ത്യയുടെ തെക്കേ അറ്റത്ത്‌ പശ്ചിമഘട്ടത്താല്‍ ചുറ്റപ്പെട്ട്‌ സംസ്കാര സമ്പന്നവും ആചാര സമ്പുഷ്ടവുമായ നാഗര്‍കോവില്‍ എന്ന് പറയുന്ന ഒരു നാടുണ്ട് , മഞ്ചു വാര്യര്‍ അവിടെയാണ് ജനിച്ചത്‌ . നടക്കാന്‍ പഠിക്കും മുന്‍പ്‌ അവര്‍ ഡാന്‍സ് ചെയ്തു എന്നാണ് പറയപ്പെടുന്നത്‌. പിന്നീട് അവര്‍ പരമ്പരാഗത കലകളുടെ,തെയ്യം പോലുള്ള കലകളുടെ ഈറ്റില്ലമായ കണ്ണൂരിലേക്ക് താമസം മാറി. വളരെ ചെറിയ [പ്രായത്തില്‍ തന്നെ ഇത്തരം ഒരു പാരമ്പര്യത്തില്‍ വളര്‍ന്നു വന്നവരാണ് മഞ്ചു വാര്യര്‍. നാലാം വയസ്സില്‍ തന്നെ മഞ്ചു വാര്യര്‍ ഭരതനാട്യവും കുച്ചിപ്പുടി യും മോഹിനിയാട്ടവും പഠിച്ചു തുടങ്ങി. നാഗര്‍ കോവിലിലെ ശ്രീമതി.സെലിന്‍ കുമാരിയാല്‍ ശാസ്ത്രീയ നൃത്തത്തിലേക്ക്‌ വന്നു. വളരെ പ്രഗല്‍ഭരായ ശ്രീമതി ആര്‍.എല്‍ .വി ദേവി,ശ്രി ആര്‍ .എല്‍.വി. വേണു,കലാമണ്ഡലം ശ്രീ ഗോപിനാഥ് എന്‍.വി കൃഷ്ണന്‍ മാസ്റ്റര്‍ തുടങ്ങിയ ഗുരുക്കന്മാരുടെ കീഴില്‍ നൃത്തം അഭ്യസിച്ചു. കര്‍മ്മാനുഷ്‌ഠാന പ്രധാനമായ അച്ചടക്കത്തോടെയുള്ള ശിക്ഷണം അവരെ ശ്ലാഘ്യയായ ഒരു നര്‍ത്തകിയാക്കി മാറ്റി. മഞ്ചു വാര്യര്‍ സ്വയം ഒരു നൃത്തമാണ്. പഠിച്ചത് പ്രാവര്‍ത്തികമാക്കി എന്നതല്ല അവരുടെ പ്രത്യേകത, അതിലലിഞ്ഞു ചേരുന്നു എന്നതാണ്. ആചാരങ്ങള്‍ക്ക് വിള്ളലേല്‍പ്പിക്കാതെയുള്ള പുതുമനിറഞ്ഞ ശാസ്ത്രീയ കലാരൂപം കണ്ടിരിക്കുന്നത് തന്നെ സന്തോഷം തരുന്ന കാര്യമാണ്.

മഞ്ചു വാര്യരുടെ നൃത്തജീവിതത്തിന്‍റെ ആദ്യദിനങ്ങളില്‍ തന്നെ, എപ്പോഴൊക്കെ നൃത്തം അവതരിപ്പിച്ചോ അപ്പോഴൊക്കെ പ്രേക്ഷകരെ കോരിത്തരിപ്പിക്കുന്ന പ്രകടനം അവര്‍ കാഴ്ച വെച്ചു . സ്കൂളില്‍ പഠിക്കുമ്പോള്‍ കേരള സര്‍ക്കാറിന്‍റെ കലാതിലകപ്പട്ടവും ഏവരുടെയും അംഗീകാരവും നേടാന്‍ അവര്‍ക്ക് സാധിച്ചു. പ്രഭുദേവ, മധുബാല, ശോഭന തുടങ്ങിയ പ്രഗല്‍ഭ പ്രതിഭകളുടെ കൂടെ വേദി പങ്കിട്ടു . ഇന്ത്യയില്‍ സംഘടിപ്പിക്കപ്പെട്ട മിസ്സ്‌ വേള്‍ഡ് മത്സരത്തിലെ പ്രകടനത്താല്‍ മഞ്ചുവാര്യരുടെ കഴിവ്‌ ലോകമെങ്ങും അറിഞ്ഞു. പ്രേക്ഷകരുടെ മനസ്സിലേക്ക് മഞ്ചു വാര്യര്‍ നര്‍ത്തനമാടി.